انا على يمناك لصابـك  الضيـق
حرام لقلبهـا عليهـم  حريقـه
جرب وتلقى الفعل ينبيك تصديق
أغير الاوضـاع بأيـة  طريقـه
على الولي علقت دعوي  تعليـق
والا على الاجواد مالـي عليقـه
ابلعن الشيطان غبشه  وتشريـق
والله لانشف كل جاري ب/ريقه
انا معك منزالنا عالي طويق
على العرب مثل النجوم المويقه
الواثق بنفسه ما يحتاج توثيق
فعله بوقت الجد احسن وثيقه
واللي يبي بين الاصاحيب تفريق
الله يطفي من عيونه بريقه
ابشر و تلقاني ليا حدك الضيق
لاجلك لا خلي الكون كله حريقه

١٤/٥/١٤٣٢ هجري

البارحه فكرت والطرف سهران

البارحه فكرت والطرف سهران = وجلست احلل وضعنا وحتواسه

حنا نعيش بمجتمع يقلب الوان = صديقك البارح يدورك فاسه

سياسة الواقع وتقسيم الاوطان = اقصر طرق روما الى الانتكاسه

ما همنا ندب الارامل اب لبنان = الدود ناخر مجتمعنا وساسه

حنا بشر نحيا على شان ننهان = نموت لجل انقول تحيا الرياسه

كان الاسد يزئر شجاعه وله شان = واليوم قامت تفترسه البساسه

سياستي ياصاحبي طوق كتمان = لن السكوت بحد زعمي سياسه

مافات خله عنك مهوب برهان = انسه ولا يحسب علينا رماسه

ياذيب يابن الذيب صاحبك تعبان = من غيبة الغالين موجعه راسه

لاشفت حالي بين دمعات واحزان = صفقت للخفاق من قوى باسه

ياخوك انا ضايق وحاير وطفشان = من شوق خشفا"صارحبه قداسه

قلبي معه صافي على طول الازمان = عجل" على صبه وبيديه كاسه

لاهو كسرني لجل ترتاح الاجفان = ولاهو تركني للزمان ويباسه

تعوتل بحلقي مع اصوات الاذان = مدري دلع ولا دخل به نجاسه

من كثر حسنه لودخل جامعة كان = ينحط له منهج يدرس ادراسه

اليا ضحك كنه من الملح سكران = توته على توته وبالقلب ماسه

واليا بكا وامطر على الخد ودان = خاويت كفي يم خده عساسه

واليا وقف كنه من المجد رويان = واليا قعد تحضنه الارض بشراسه

طاح بيده وردن مثل لون الاوجان = بغى يشم الورد و الورد باسه

يشوفني بالكون ذا كله انسان = وعيني تشوفه كل كوني وناسه

ياذيب يابن الذيب صاحبك تعبان =ومصدع وضايق وموجعه راسه



أشكر من قام بتصميم هذه المقاطع تعجز الكلمات عن شكره

السؤال الحائر

توارت عن حياة اللي يسمونه هله مقرود
ثلاث سنين ما يدري وش الأسباب بغيابه
غيابه والحزن سوا بحاله شي مو معهود
سوات الريح لاهبت مع النيران في غابه
سواتٍ صرّمت فيه الحشى تصريمة العنقود
سواتٍ شيّبت من كودها الشعرات باهدابه
سواتٍ خلت الأيام في عينه ليالي سود
يبات ودمعة عيونه على خده ويصحا به
كأنه من توفى له بعد يأس الضنى مولود
بعد ما جهّز الافراح والألعاب وثيابه
من اللي حلل لذبحه وشب النار بالبارود
من اللي قاد عمره للهلاك بغيبة أحبابه
من اللي حدها ترحل ولا قالت متى بتعود
ولا حتى رسالة تجبر الخاطر ويهنا به
من اللي قد حملها للغياب وذبحة الملهود
وهي من بد خلق الله تعرف الحال وادرابه
سؤالً ما لقى في صفحة التأويل أي ردود
ولا في صفحة الأعذار تبريرات لغيابه

 

الناس

عرفت فالدنيا من الناس نوعين

ناساً بها طيبً وناساً لعانه
احدً على ذبحك يحد السكاكين

 واحدً ليامن غبت غيبه مصانه
واحدً معك ياقف على العسر والين 

 وحدً ليامن طحت وقف مكانه
واحدً على شوفك يسوق الملايين

وحد يتضايق يوم  تجلس وزانه 
يا ناس ويش اللي حصل بالموازين

الطيب نازل والردى رفع شانه
مدري البلا فالوقت و الا البلا وين

والا بلينا الوقت حنا طمانه
يا لله يا والي العبادالمساكين

 ان الوفي بالوقت ترفع مكانه
وانك تذل اهل الردى والضعيفين

اللي دماهم كل ابوها خيانه
قد قال عبد الله يسند على حسين 

 قول حفظه الوقت صدق وظمانه
مايستشك يا حسين كودالرديين 

 والا ترى الطيب وسيع" بطانه
القول هذا كان وقت القديمين

و اليوم لا تامن ولا به امانه
خلك فطين و حاذر تغمض العين

ترى الحذر هالوقت راس الفطانه

١٩ / ٣ /١٤٢٩ هجري

طهر ذاتي

ياليل كيف اسهر بوجهك و لا اطيح

و أنا وفايه يحترم طهر ذاتي
يالليل لو جيتك وابي منك تصريح

خايف تقول الوضع يا بغى السكاتي
اتعبت رجلي في دروب المساريح

ولا لقيت الا التعب من صلاتي
الطعنه اللي بالظهر دون تلميح

اقلها يمكن تسبب مماتي
وسيفً ذخرته للوجيه المشافيح

اثري ذخرته لاجل ينهي حياتي
نورت لك ليل الوفاء بالمصابيح 

 وانا سريت الليل تابع عصاتي
دمعً نثرته مثل دمع التماسيح

صدقتها يوم الصدق من صفاتي
واليوم خذها كاش ما فيه تلميح

فضحت كذبك وانتزعت العباتي
السالفه ما هيب لعبة مسابيح

السالفه بين الخطر والنجاتي
رفعت نفسي عن هروج الدحاديح

ورفعتها فوق السماء بالعلاتي
انته تعرف اني بعيد المشاويح

شلفاي زراقه وتشهد شباتي
ما نيب طالب للقصص اي توضيح

ابحترم نفسي معا طهر ذاتي

١٢/٩/١٤٢٩ هجري

الليل ضاوني  وانا شوفي كما شوف الضرير 

 اللي تعنز بالظلام وصار له احسن خوي
في داخل حربً ضروس بين المغيره والنذير 

 الهم في داخل فؤادي قام يزويني زوي
احترت بين التربيه والدين والوضع الخطير

مرات يجذبني الوضع و الويه في كفي لوي
اكثر عباد الله عمى لو كان له لشوفٍ بصير

ما يعرف الدرب السوي يمشي على غير السوي
مبدا الحياه ان تكون انسان ما عندك ضمير

مبدا نشوفه سايدٍ في مجتمعنا الفوضوي
قال المثل اذا سرقت اسرق فرس والا بعير

وأذا عشقت اعشق غزالً ذات حس انثوي
وانا بقول اذا سرقت فالمجتمع تصبح كبير

العيش في هذا الزمن يذبح فؤاد المكتوي
مسرح عليه اجمل عروض يشاهده جمعً غفير 

 سيناريو مكتوب والعالم ممثل فهلوي
مسكين يا هذا الزمن كل على شتمك يغير

لو ان مابك مشكله الوضع منا مأسوي
فالخاتمه وجهة نظر بين المفتح والضرير

و المسأله من راسها فالكف حاويها حوي

 14/ 4/1430هجري