السبت، 26 فبراير، 2011

ملهمة الشعر

احسن حياه انك تعيش ابلا  فكر
ولا تحس ولا يجي عندك شعور
واحسن حياة اتوصل لحد السكر
 من دون لاتشرب ولا تقعد تخور
واحسن حياة اتعيش في جو السحر
من دون لا تكفر و لا تعمل سحور
واحسن حياة تشوف ملهمة الشعر 
 اللي تزيد النور في دنياك نور
ام العيون النجل حالية الثغر
المدخله بالقلب انواع السرور
الثلج وسط الثغر من دونه جمر
والخد حاوي كل انواع الزهور
الخصر حدد مشكلة هذا العصر
 فقري و تحته زاد يكفي له دهور
منها يغار الورد و يغار الزهر
انفاسها ازكى من اطياب العطور
ومنها يغار النجم و يغار القمر
 جمالها غطى على بدر البدور
لبى الجبين و لبا مصقول النحر
لبيه يا عمري على مر العصور
احسن حياة ايمان ما خالط كفر
 وانك تعيش بقلب سيدة الشعور
٢٠/٩/١٤٣١ هجري

هلا بك

هلابك عد مالبا الحجيج بداخل الميقات 
هلابك كثر ما صلى مصلي خايف الحوبه
هلا بك و الحشا بيتك تفضل واسعد الحزات 
 هلا بك عد ما نرجي عظيم الشان بالتوبه
هلا بك والجفون اللي تضمك وسطها بسكات
تفاخر بك وخيمة جبنا بالقلب منصوبه 
عرفتك وارتبط قلبي بقلبك واحسن الحظات
محبه تحيي القلب الهدام و تغفر ذنوبه
احبك يا هوا بالي ولو راحت علوم وجات
 محبه صادقه داخل عروق القلب مصبوبه
معك قلبي بدا يحيا معاك انتي ترى بالذات
عرفت ان الهوا يعطي غرام الواحد اعذوبه

الثلاثاء، 22 فبراير، 2011

على غير ميعاد

جتني تودعني على غير ميعاد
و الحزن يرسم فالملامح كأبه
حسيت في جوفي من الجمر وقاد
و من الحزن ظلل علينا سحابه
و امطر علينا الهم و الدمع يزداد
واحوالنا في وقتها ما تشابه
رغم ان انا عاقل و مبدع و قصاد
ازريت لا جمع حروف الكتابه
غدت هجوسي بين صادر و وراد
الهم في قلبي دفق سم نابه
و بديت اعيش بغربةً داخل بلاد
درب الامل يلمع بعيني سرابه
رسمت من حزني على بعدها ماد
اركانه الاثنين غم و رتابه
وتشكلت بالعين ثلاثة ابعاد
همً و غم و مقتفيهم ضبابه
بديت اردد رائعة عبده ابعاد
وغنيت لحن الميجنه والصبابه
دربي على بيض الورق والفكر زاد
عشت بغرابه و اندفن في غرابه
الله يجعل عمرها كله اعياد
تعيش فيه بفرحةً و تهنابه
بعد الوداع اللي على غير ميعاد
الله يجنبها الحزن والكأبه

١٧/١/١٤٣٢ هجري

الاثنين، 21 فبراير، 2011

مل القلم

مل القلم يرسم مبادي حياتي
 ومليت من ذكر السنين القديمات
  ياليتها تقفي ولا عاد تاتي 
 ذكرى تصحيني من النوم لاجات
ذكرى سنين الغي والسيائتي
وذكرى سنين البعد وضياع الاوقات
 فيها عصيت الله بكل الجهاتي
 وعنيت رجلي في دروب المتاهات
 طاوعت نفسي زينتلي سواتي
اثري غريق المعصيه والملذات
 وانا ادري انه ماتوقي عباتي
لاحسبة الحسبه وفتحت ملفات
 مير الرجا بالله عضيم الصفاتي
محصي عدد خلقه ومنشي السماوات
الواحد القهار محيي النباتي
يصفح ويغفر زلت العبد لامات
وختامها ياليت ماعاد تاتي
ذكرى تصحيني من النوم لاجات

الأربعاء، 16 فبراير، 2011


     
وين ما يمطر سحاب الشوق يأتيني خراجه
كني أخر من ملك له قلب ودموعٍ عصيه
وأني أجمل من خيال الشاعر المطوي سراجه
وأنتي أنتي لا شبيه الاالبدايات ألنديه
والله أن النوم لأمر الجفن شفته سماجه
كيف أنام وفوق هذي الأرض من يعطف عليه
وإنتي اللي روضت جرحي وسميتي علاجه
سمته أو سمته راضيه لو هو تسبب فا المنيه
وأدري أنك ترحمين القلب يا سر ابتهاجه
وأدري أنك مورقه بالطيب يالنفس الرضيه
ياثبات النور.. والنور في عز إرتجاجه 
 يارتجاج الغصن لا هزّت مراجيح الصبيه
ياشجرْ لاح لعيون القلب في وسط العجاجه
يا مطر بللّل هدب روحي وضمنه يديه
أدري الذكرى تمر القلب وتكدر مزاجه
لكن الميعاد غير اللي مضى لك ياشقيه
قولي حاجه يالذ من المواعيد أي حاجه 
 بس لا نبقى كذا مثل الرضا والعنجهيه     
 

الاثنين، 14 فبراير، 2011

توني عرفت الحب

توني عرفت الحب وأشواق الهواوي
يوم هاويت الهنوف ألنرجسيه
بنت شيخ وبنت قرمً للهقاوي
وأخت ذيبً مالك صك ألحميه
قومها قوم المكارم والعزاوي
تعتزي وتجيك ميه فوق ميه
خبروها عن خفوقي يوم تأوي
ينتعش مثل العرب يوم برديه
لو تبي ما ملك وما في الجيب حاوي
لرخصه والعمر مني له هديه
وان بديت بوصفها عين النداوي
والتفاتة ضبي وقبالة عبيه
وان نضرت لخدها بستان حاوي
ياسمين وفل وأزهار(ن)نديه
و الشفايف لا تعد إلا الرهاوي
جمرتين(ن)تشتعل في نار حيه
والثغر خاتم تزين به الحكاوي
فيه صفة لول سوت بي سويه
والنهد ناضج ثمار(ن)و متراوي
كنه يسوق لرمان الحويه
والخصر ضامر تقول(ن)فيه لأوي
لا تطرق ما تقول إلا عصيه
الردف طعس(ن)رفيع(ن) ومتساوي 
 دوب فهّد ديمته من عقربيه
طبعها طبع الغرير اللي حياوي
وجهها بدر(ن) و إنا ما شفت زيه
لو بوصف زينها ما نيب قاوي
باختصار احل من القمرا شويه

الأحد، 13 فبراير، 2011

الأربعاء، 2 فبراير، 2011


الحزن اشوفه كاسي كل زينك  
تخفيه عني ضحكتك بس بااين   
الدمع اشوفه مجتمع وسط عينك
 ودك بنثره بس ما هوب هاين  
الهم طاغي فوق غالي حنينك
والعمر لابده مع الوقت زاين    
يا عل تتهني بباقي سنينك
واللي كتبه الله على العبد كاين  
هذي يدي تطلب مواصل يدينك
والقلب اشوف انه على القلب ماين  

الهم

الهم فيني عانق اسوار واسوار 
 والليل ما يرحم والأوضاع شينه
علمت انا بغيابك الشوق واحتار
ألين شفت الدمع باطراف عينه
صبرت حتى هاجر الصبر وانهار
وبكيت مع نآآآآي السنين الحزينة
ونسيت بعض (إ)حروفي بجوف الافكار
اللي مضغها الوقت في ساعتينه
كانت هنا طفله وكنا هنا صغار
وكانت علاقتنا علاقه متينه
نظراتها تسمح لك تراجع شهار
واشفاتها يا ناشد الموت وينه
كانت تشيل الثلج من وجنة النار
وكانت تنام امن الدلع في يدينه
وكانت تكفل للمدينه بالانوار
واليوم باعت للظلام المدينه
ياقلب لاتنشد لياليك وش صار
هذا طريق وكلنا سالكينه
20/5 /1429 هجري